Sarrera | Mapa | Kontaktua | Guri buruz |   
Hemen zaude: Sarrera »  Euskara Patronatuaren plangintzak »  Gurien »  Enpresak euskaraz garatzen

Enpresak euskaraz garatzen

2006-09-25 / 07:00 / Mailo Oiarzabal - DIARIO VASCO   ENPRESAK

Erakunde eta enpresen babesarekin jaio den Elegune hizkuntza-gestiorako gune teknikoa aurkeztu dute Azpeitian.

Azpeitiko Udalak bere Euskara Patronatuaren eskutik abian jarri duen Elegune enpresen hizkuntza-gestiorako gune teknikoa jendaurrean aurkeztu zuen 2006-09-22an. Euskararen erabilera enpresen egunerokotasunean txertatzeko balio nahi duen udal ekimenak herri-erakunde gehiagoren babesa eta laguntza ere badu. Horrela, Julian Eizmendi alkatearekin batera parte hartu zuten aurkezpenean Joxe Joan Gonzalez de Txabarri Gipuzkoako ahaldun nagusiak, Patxi Baztarrika, Eusko Jaurlaritzaren Hizkuntza Politikarako sailburuordeak, eta Andres Urrutia euskaltzain buruak.

Azpeitiko enpresak dira, ordea, Eleguneren oinarria. Hizkuntza-gestiorako bulego tekniko berriak herriko enpresa nagusienen atxekimendua lortu du jada, eta hemendik aurrera ertain eta txikiagoekin ere elkarlanean aritzea izango da Eleguneren helburua. Proiektua dagoeneko gauzatzen ari diren bi enpresetako ordezkariek, Bieleko Luis Juaristik eta Zubiolako María Ángeles Amenabarrek, hartu zuten hitza atzoko ekitaldian, eta biek nabarmendu zuten euskararen erabilera beraien enpresetan barneratzearen garrantzia eta beharra. «Bielen euskara nahi dugu eta behar dugu», horrela laburbildu zuen Juaristik bere enpresaren jarrera.

Enpresen txanda

Azpeitiko Euskara Patronatuak urteak eman ditu Eleguneren proiektua gauzatzen, eta orain bere aurkezpenak ia bat egin du Eusko Jaurlaritzak ildo beretik martxan jarri duen LanHitz programarekin. Julian Eizmendik nabarmendu zuenez, «euskararen normalizazioaren bidean , enpresen txanda heldu da, eta oraingoan, berriz ere, Azpeitia lehenengo herria izango da Eusko Jaurlaritzak sortutako programa garrantzitsu bat (LanHitz) errealitatean aplikatzen».

Gainerako erakundeetako ordezkariek, beraien babesa agertzeaz gain, Azpeitiko Udala eta enpresak zoriondu zituzten Elegune bezalako proiektu bat bultzatzeagatik.

Gonzalez de Txabarriren esanetan, «euskalgintzak urtetan espero izan duen urratsa» da Elegune, eta ikuspegi berri bat dakarrena, euskararen erabilera «berrikuntzaren, kalitatearen eta garapenaren osagai bezala» aurkezten dielako enpresei.

Baztarrikak, berriz, euskararen erabilera hizkuntza politikaren «erronka nagusia» dela esan zuen, eta erabilera lan-munduaren esparruan sustatzea erronka horren ardatzetako bat. Alde horretatik, Elegune LanHitzen asmoetan «guztiz sartzen» dela nabarmendu zuen, «gainera ekimen eredugarria da, azpeitiarrek harrotasunez aurkez dezaketena». Urrutiak ere nabarmendu zuen «inoiz baino beharrezkoagoa» dela «euskara eta gestioa uztartzea, enpresa eta gizartea euskararen bidez estekatzeko».


Dokumentu interesgarriak (irakurtzeko gainean sakatu)


Dokumentu interesgarriak (irakurtzeko gainean sakatu)

Ildo bereko artikuluak (irakurtzeko gainean sakatu)


Inprimatu


Erantzun

Euskara Patronatua
Tel.:943-814518
Faxa: 943-811947
erabili@erabili.eus